بجلی کے بلوں میں ریلیف کیلئے آئی ایم ایف سے رابطے

وفاقی حکومت نے سیلاب متاثرین کو بجلی کے بلوں میں ایک ماہ کا استثنی دینے پر غور شروع کر دیا ہے جبکہ اس حوالے سے وزیراعظم شہباز شریف نے وزارت خزانہ کو عالمی مالیاتی فنڈ (IMF) سے رابطہ کرنے کی ہدایت بھی کی ہے۔ تفصیلات کے مطابق محمد شہباز شریف کا کہنا ہے کہ وزارت خزانہ آئی ایم ایف کے ساتھ ممکنہ ریلیف پر بات چیت کرے اور شہر ہوں یا دیہات، ریلیف پورے پاکستان کے سیلاب زدہ علاقوں میں دیا جائے گا! علاوہ ازیں حکومت نے اربن فلڈنگ پر قابو پانے کے لیے نیا لائحہ عمل اور پالیسی تشکیل دینے کا فیصلہ بھی کیا ہے جس پر ملک بھر میں حالیہ تباہ کن سیلابی صورتحال کے بعد وزارت موسمیاتی تبدیلی کو بھی متحرک کر دیا گیا ہے۔

وزارت موسمیاتی تبدیلی کے مطابق وزیراعظم نے اس وزارت کو اربن فلڈنگ اور جنگلات کے بے دریغ کٹاؤ پر فوری اقدامات کا ٹاسک سونپا اور صوبوں کو کلائمیٹ ریزیلینس ایکشن پلان کے اہداف تیار کرنے کی ہدایت دی ہے۔ حکام کے مطابق وزارت موسمیاتی تبدیلی کلائمیٹ ریزیلینس ایکشن پلان پر صوبوں کے ساتھ تعامل کرے اور صوبوں سے اربن فلڈنگ اور جنگلات کے کٹاؤ کے معاملے پر مشاورت کرتے ہوئے ان سے اس معاملے پر رائے طلب کرے گی۔

صوبوں کے ہمراہ اربن فلڈنگ کو روکنے اور شہری علاقوں میں ڈرینیج سسٹم بہتر بنانے پر فوکس کیا جائے گا اور جنگلات کے کٹاؤ پر قابو پانے کے لیے وزارت موسمیاتی تبدیلی صوبوں کے ساتھ مل کر پالیسی بنائے گی جس کے ذریعے آئندہ ممکنہ سیلابی خطرات کو کم کرنے کی حکمت عملی بھی تیار کی جائے گی۔