صدر مملکت اہم دورے پر چین پہنچ گئے
صدرِ مملکت آصف علی زرداری چین کے سرکاری دورے پر آج چنگدو پہنچے جہاں ایئرپورٹ پر چین کے نائب وزیر خارجہ سن وی دونگ اور صوبہ سیچوان کے نائب گورنر ہوانگ ریشیا نے ان کا پُرتپاک استقبال کیا۔ اس موقع پر پاکستانی سفیر خالد ہاشمی اور پاکستان میں چین کے نامزد سفیر جیانگ زائی ڈونگ بھی موجود تھے۔ چینی سفیر جیانگ زائی ڈونگ اس دورے کی اہمیت کے پیش نظر خصوصی طور پر پہلے ہی چنگدو پہنچ گئے تھے جو صدر آصف زرداری کے ہمراہ تمام ملاقاتوں اور سرگرمیوں میں شریک ہوں گے۔
آصف علی زرداری اپنے دورے کے دوران چین کی اعلی قیادت کے ساتھ بھی ملاقاتیں کریں گے جن میں دوطرفہ تعلقات کو مزید وسعت دینے، مختلف شعبوں میں باہمی تعاون بڑھانے اور پاک چین آل ویدر اسٹریٹجک کوآپریٹو پارٹنرشپ کو مزید آگے بڑھانے پر بات چیت ہو گی۔ صدر مملکت اس دورے کے دوران تجارت، سرمایہ کاری، توانائی، انفراسٹرکچر اور عوامی روابط کے فروغ پر بھی تبادلہ خیال کریں گے۔
