ایران اور پاکستان کے درمیان ہفتہ وار پروازوں کو بڑھا کر 24 کر دیا گیا

صدر اسلامی جمہوریہ ایران ڈاکٹر مسعود پزشکیان کے ہمراہ ایرانی وزیر مواصلات اور ہوا بازیِ کے سربراہ کے دورہ پاکستان کے بعد دونوں ممالک کے درمیان ہوائی نقل و حمل کے تعاون کی دستاویز پر دستخط ہوئے، جس کے تحت ایران اور پاکستان کے درمیان پروازوں کی گنجائش بڑھا کر 24 پروازیں فی ہفتہ کر دی گئی اور اس کے نتیجے میں اسلامی جمہوریہ ایران کی ایئر لائن (ہما) کی مشہد کراچی پرواز بھی بحال ہوگئی۔ اسی طرح پروازوں کے راستوں میں رکاوٹوں کا خاتمہ، نیویگیشن کے شعبے میں مشترکہ تعاون اور ہوا بازی کی خصوصی تربیت کی ترقی بھی معاہدے میں شامل ہے۔ ایران کے محکمہ ہوا بازی کے معاون سید حمید رضا صانعی کے مطابق پاکستانیوں کی سالوں سے یہ خواہش تھی، خاص طور پر ایامِ اربعین میں زائرین کو ایرانی ایئر لائنز پہلے مشہد اور پھر نجف منتقل کریں۔ انہوں نے کہا کہ قومی اور بین الاقوامی قوانین کے مطابق اس طرح کے راستے کا قیام ممکن ہے اور یہ مختلف ممالک میں جاری ہے۔

صانعی نے کہا کہ پاکستانی بھائیوں کی خواہش کے مطابق اب ایران اور پاکستان کے مختلف شہروں بالخصوص لاہور، کراچی اور اسلام آباد کے درمیان پروازیں بڑھائی جا رہی ہیں اور گذشتہ ہفتوں میں کئی ایرانی ایئر لائنز نے پروازوں کے لائسنس حاصل کیے ہیں۔ انہوں نے کوئٹہ زاہدان کے راستے کا ذکر کرتے ہوئے کہا کہ اس روٹ پر کبھی بھی کوئی براہ راست پرواز نہیں ہوئی اور خاص طور پر تاجر اور کاروباری افراد کوئٹہ قطر تہران زاہدان کا طویل سفر کرتے ہیں، جس کی وجہ سے دونوں ممالک کے لوگوں کو بہت سی مشکلات کا سامنا کرنا پڑتا ہے۔

انہوں نے مزید کہا کہ اب ہم ضروری اجازت نامے حاصل کرنے کے بعد اس روٹ پر بھی براہ راست پروازیں شروع کرنے کی کوشش کر رہے ہیں۔ انہوں نے زور دیکر کہا کہ اس سلسلے میں پاکستان محکمہ ایوی ایشن کے ساتھ اچھی میٹنگیں ہوئی ہیں، جن کا حتمی فیصلہ دونوں ممالک کے مشترکہ اقتصادی کمیشن میں کیا جائیگا۔ واضح رہے کہ ایران ایئر ٹور ایئر لائنز کی ایک ایئربس 300 کے اسلام آباد بین الاقوامی ہوائی اڈے پر اترنے سے تہران سے اسلام آباد کے لیے براہ راست پروازوں کا باقاعدہ آغاز ہوچکا ہے، کل ہفتہ وار پروازوں کی تعداد پانچ ہے۔