مزاحمت کو غیر مسلح کرنا اسرائیل کا مطالبہ ہے، حزب اللہ لبنان

مزاحمتی محاذ کے ساتھ منسلک لبنانی پارلیمانی اتحاد الوفاء للمقاومہ کے رکن حسن عزالدین نے اعلان کیا ہے کہ یہ اتحاد پارلیمانی انتخابات میں حصہ لینے کے لئے حقیقی معنوں میں تیار ہے۔ اس بات پر زور دیتے ہوئے کہ آئندہ پارلیمانی انتخابات میں لبنانی عوام کی حقیقی حمایت نظر آئے گی، حسن عزالدین نے کہا کہ تاریک ترین حالات میں بھی مزاحمت کے ساتھ کھڑے رہنے والے عوام کی یہ نسل اب بھی مزاحمت کے ساتھ کھڑی رہے گی اور اپنی امنگوں کا اظہار بیلٹ باکس کے ذریعے کرے گی۔ لبنانی پارلیمنٹ کے رکن نے تاکید کی کہ غاصب صیہونی رژیم کے بار بار کے حملے ایک مکمل جارحیت ہیں جس کی اصلی وجہ لبنانی حکومت کی جانب سے عملی اقدامات کا فقدان ہے۔ انہوں نے لبنانی حکومت سے مطالبہ کیا کہ وہ اپنی ذمہ داریاں پوری کرتے ہوئے لبنانی عوام پر ثابت کرے کہ وہ جارحیت کے خلاف کم از کم آواز ہی اٹھائے گی! انہوں نے زور دیتے ہوئے کہا کہ مزاحمت کو غیر مسلح کرنے سے متعلق لبنانی حکومت کا فیصلہ درحقیقت غیر ملکی اور خصوصا اسرائیلی مطالبہ ہے! میڈیا کے ساتھ اپنی گفتگو کے آخر میں انہوں نے تاکید کرتے ہوئے مزید کہا کہ آج کی جارحیت میں نہ صرف مزاحمت، اس کے مرکز، امل اور حزب اللہ کو ہی بلکہ مزاحمت کے ہتھیاروں کو بھی بطور خاص نشانہ بنایا جا رہا ہے کیونکہ درحقیقت یہی ہتھیار اسرائیل کے مذموم عزائم کے حصول اور لبنان پر مکمل قبضے میں بنیادی ترین رکاوٹ ہیں!