ہم ناجائز دباؤ کے سامنے کبھی نہ جھکیں گے، ایران

ایرانی جوہری توانائی تنظیم کے سربراہ ڈاکٹر محمد اسلامی نے آج عالمی جوہری توانائی ایجنسی (IAEA) کی 69ویں جنرل کانفرنس کے ساتھ خطاب کرتے ہوئے تاکید کی ہے کہ سلامتی کونسل کی قرارداد 2231 اپنے طے شدہ شیڈول کے مطابق 18 اکتوبر 2025 کے روز ختم ہو جائے گی۔ ڈاکٹر محمد اسلامی نے زور دیتے ہوئے کہا کہ ایران، ناجائز دباؤ کے سامنے کبھی جھکے گا اور نہ ہی عدم جوہری پھیلاؤ کے معاہدے – این پی ٹی (NPT) و بین الاقوامی قانون کے تحت اپنے فطری و ناقابل تنسیخ حقوق سے دستبردار ہو گا۔ ایرانی نائب صدر و سربراہ ایرانی جوہری توانائی تنظیم نے عالمی جوہری توانائی ایجنسی کے ہیڈکوارٹر میں، جوہری مسائل پر اسلامی جمہوریہ ایران کے موقف کی وضاحت کرتے ہوئے کہا کہ آج عالمی جوہری توانائی ایجنسی ایک انتہائی حساس و تاریخی موڑ پر کھڑی ہے.. جبکہ اسرائیلی رژیم اور امریکہ کے جارحانہ اقدامات کے نتیجے میں جوہری عدم پھیلاؤ کے معاہدے (NPT) اور بین الاقوامی قانون کو شدید خطرات لاحق ہیں۔ 

انہوں نے کہا کہ 13 جون 2025 بروز جمعہ قابض اسرائیلی رژیم ایک بہت بڑے جرم کی مرتکب ہوئی اور میرے ملک پر فوجی حملہ کر دیا گیا جبکہ اس حملے کہ جو آئی اے ای اے کے بورڈ آف گورنرز کی جانب سے قرارداد کی منظوری کے چند گھنٹے بعد انجام پایا، کے دوران ایران میں عالمی جوہری توانائی ایجنسی کے زیر نگرانی کام کرنے والی جوہری تنصیبات کو نشانہ بنایا گیا اور نہ صرف ایرانی جوہری سائنسدانوں بلکہ اعلی فوجی کمانڈروں کو بھی ان کے اہلخانہ سمیت قتل کیا گیا نیز ہزاروں عام ایرانی شہریوں کو بھی شہید و زخمی کرتے ہوئے عظیم ایرانی قوم کو گہرا جانی و مالی نقصان پہنچایا گیا۔ ڈاکٹر محمد اسلامی نے کہا کہ 22 جون 2025 کے روز، سلامتی کونسل کے مستقل رکن اور جوہری عدم پھیلاؤ کے معاہدے (NPT) کے "معتمد” امریکہ، نے بھی اس جارحیت میں شمولیت اختیار کرتے ہوئے ایک غیر قانونی اقدام انجام دیا اور بین الاقوامی قانون، اقوام متحدہ کے چارٹر اور عالمی جوہری توانائی ایجنسی کے قانون کی صریح خلاف ورزی کرتے ہوئے، ایرانی جوہری تنصیبات پر حملہ کر دیا جس میں ایرانی جوہری صنعت کو بھاری نقصان پہنچا ہے۔

ایرانی جوہری توانائی تنظیم کے سربراہ نے تاکید کرتے ہوئے کہا کہ ایران، ناجائز دباؤ کے سامنے کبھی جھکے گا اور نہ ہی این پی ٹی (NPT) و بین الاقوامی قانون کے تحت اپنے فطری و ناقابل تنسیخ حقوق سے دستبردار ہو گا۔ انہوں نے کہا کہ ہم عالمی برادری سے مطالبہ کرتے ہیں کہ وہ کھلی جارحیت پر مبنی ان غیر قانونی اقدامات کی واضح مذمت اور خود مختاری، طاقت کے عدم استعمال اور تنازعات کے پرامن حل کے اصولوں کی حمایت کرے۔ ڈاکٹر محمد اسلامی نے تاکید کی کہ اگرچہ ایران سفارتی و سیاسی حل پر مکمل یقین رکھتا ہے لیکن وہ سیاسی، نفسیاتی و فوجی دباؤ کے سامنے کسی صورت نہ جھکے گا اور ایرانی عوام اپنے حقوق کے حصول کے لئے پرعزم و متحد ہیں۔ سربراہ ایرانی جوہری توانائی تنظیم نے مزید کہا کہ ہم عالمی جوہری توانائی ایجنسی کے ان تمام اراکین کا تہہ دل سے شکریہ ادا کرتے ہیں جو اس بے مثال جارحیت کے خلاف اٹھ کھڑے ہوئے اور اقوام متحدہ کے چارٹر کے اصولوں کا دفاع کرتے ہوئے تاریخ کے درست جانب کھڑے رہے۔