خلیج تعاون کونسل کیجانب سے ایران و علاقائی ممالک کے باہمی تعلقات کو مضبوط بنانے پر تاکید
خلیج تعاون کونسل کے سیکرٹری جنرل جاسم البدیوی نے اقوام متحدہ کی جنرل اسمبلی کے سالانہ اجلاس میں شرکت کے لئے نیویارک میں موجود ایرانی وزیر خارجہ سید عباس عراقچی کے ساتھ ملاقات و گفتگو کی ہے۔ ایرانی خبررساں ایجنسی فارس نیوز کے مطابق اس ملاقات میں ایران و خلیج تعاون کونسل کے رکن ممالک کے درمیان باہمی تعلقات کا جائزہ لیا گیا جس کے بعد دونوں فریقوں نے باہمی اعتماد و افہام و تفہیم کو مضبوط بنانے کے لئے، خلیج فارس اور بحیرہ عمان کے جنوبی ساحلوں پر واقع ممالک اور ایران کے درمیان تمام شعبوں میں باہمی تعلقات کو وسعت دینے کی اہمیت پر تاکید کی اور مشترکہ مفادات و چیلنجوں پر توجہ مرکوز رکھنے کی ضرورت پر زور دیا۔
اس موقع پر علاقائی ممالک کے ساتھ اچھی ہمسائیگی پر مبنی اسلامی جمہوریہ ایران کی اصولی پالیسی کا ذکر کرتے ہوئے سید عباس عراقچی نے کہا کہ ایران، ہمسایہ ممالک کے ساتھ تمام شعبوں میں باہمی تعلقات کو گہرا کرنے کے لئے تمام صلاحیتوں کو بروئے کار لانے کو تیار ہے۔ سید عباس عراقچی نے غاصب صیہونی رژیم کے جنگی جنون اور تسلط پسندانہ عزائم سے علاقائی امن و استحکام کو لاحق سنگین خطرات پر روشنی ڈالی اور غزہ میں غاصب و سفاک اسرائیلی رژیم کے ہاتھوں جاری فلسطینی عوام کی نسل کشی کو روکنے نیز علاقائی ممالک کے خلاف غاصب صیہونی رژیم کی جارحیت کا مقابلہ کرنے کے لئے علاقائی ممالک کی جانب سے مزید سنجیدہ تعاون و کوششوں کی ضرورت پر زور دیا۔
ادھر خلیج تعاون کونسل کے سیکرٹری جنرل نے بھی خلیج تعاون کونسل اور ایران کے درمیان جاری مشاورت کے تسلسل پر اطمینان کا اظہار کرتے ہوئے ایران و علاقائی ممالک کے درمیان باہمی تعلقات کی مضبوطی کو علاقائی سلامتی و استحکام کی ضمانت قرار دیا اور مقبوضہ فلسطین کی صورتحال اور خطے بھر میں جاری جنگ کے نتائج پر شدید تشویش کا اظہار کرتے ہوئے مقبوضہ فلسطین میں جاری سفاک صیہونی رژیم کے کھلے جنگی جرائم و نسل کشی کو روکنے کے لئے عالمی برادری کی مشترکہ ذمہ داری پر زور دیا۔
