وفاقی حکومت کا سیلاب متاثرین کو بجلی کے بلوں میں ریلیف دینے پر غور

وفاقی حکومت نے سیلاب متاثرین کیلئے بجلی بلوں میں بڑا ریلیف دینے پر غور شروع کر دیا ہے جبکہ فصلوں اور جانوروں کے نقصان کے معاوضے کیلئے کسان پیکیج لانے کا بھی اعلان کیا گیا ہے۔ تفصیلات کے مطابق وفاقی حکومت، بجلی کے بلوں پر جنرل سیلز ٹیکس، ایف سی سرچارج اور فکس چارجز ختم کرنے پر غور کر رہی ہے جبکہ فیول پرائس ایڈجسٹمنٹ پر جنرل سیلز ٹیکس اور ایکسائز ڈیوٹی کے خاتمے کی تجویز بھی دی گئی ہے۔ علاوہ ازیں بجلی کے بلوں پر انکم ٹیکس، مزید اور فاضل ٹیکس سمیت ریٹیلر سیلز ٹیکس کا خاتمہ بھی زیر غور ہے۔

اس بارے وفاقی وزیر رانا تنویر حسین کا کہنا ہے کہ سیلاب متاثرین کے بجلی کے بلوں پر ٹیکسز کے خاتمے کیلئے کام کیا جا رہا ہے جبکہ فوری طور پر سیلاب متاثرین کے ٹیکس معاف کردیئے جائیں گے انہیں بلوں میں ریلیف وفاقی حکومت دے گی اور لینڈ ریونیو صوبائی حکومت معاف کرے گی۔ رانا تنویر حسین نے کہا کہ حکومت سیلاب زدہ علاقوں میں بجلی کے اضافی بلوں کا نوٹس لے گی جبکہ متاثرہ علاقوں کے یہ بل، پہلے ہی پرنٹ ہو چکے ہیں۔

دوسری جانب حکومت نے فصلوں اور جانوروں کے نقصان کے ازالے کیلئے کسان پیکیج لانے کا بھی فیصلہ کیا ہے۔

اس حوالے سے وفاقی وزیر رانا تنویر حسین نے کہا کہ سیلاب سے متاثرہ علاقوں کا سروے مکمل ہوتے ہی کسان پیکیج کا اعلان کر دیا جائے گا اور ہفتے 10 روز تک سیلاب متاثرہ علاقوں کا سروے مکمل کر لیا جائے گا جبکہ سیلاب سے متاثرہ علاقوں میں فصلوں کے نقصان کا ابتدائی ڈیٹا بھی مرتب کر لیا گیا ہے۔ انہوں نے مزید کہا کہ سیلاب سے ہر فصل کا ایک سے 3 فیصد تک نقصان ہوا ہے البتہ اس دوران چاول کا سب سے زیادہ نقصان ہوا ہے جبکہ سب سے زیادہ گوجرانوالہ ڈویژن میں، فصلوں کا 18 فیصد تک نقصان ہوا ہے۔