غزہ کی حمایت انتہائی درست فیصلہ تھا، حزب اللہ لبنان

لبنانی پارلیمنٹ میں مزاحمتی محاذ کے ساتھ منسلک اتحاد الوفاء للمقاومۃ محمد رعد نے اعلان کیا ہے کہ غاصب صہیونیوں کی جانب سے شہید سید حسن نصر اللہ کو نشانہ بنانا پوری حزب اللہ کو نشانہ بنانا تھا جبکہ یہ بات طوفان الاقصی آپریشن اور دشمن کے ساتھ براہ راست تصادم کے آغاز سے ہی واضح تھی۔ محمد رعد نے کہا کہ مزاحمت نے سال 2006 کی 33 روزہ جنگ میں اسرائیل کی برملاء شکست اور ونوگراڈ کمیشن کی سفارشات کے بعد سے، حزب اللہ لبنان کو نشانہ بنانے کے لئے دشمن کی وسیع تیاریوں کا بغور مشاہدہ کیا ہے۔ 

المیادین کو انٹرویو دیتے ہوئے لبنانی پارلیمنٹ میں مزاحمتی اتحاد کے سربراہ نے تاکید کی کہ غزہ کے مظلوم عوام کی حمایت کے علاوہ مزاحمت کے پاس کوئی دوسرا انسانی، اخلاقی، قومی یا عرب رستہ موجود نہ تھا جبکہ مزاحمت کے طور پر، ہم نے بھانپ لیا تھا کہ دشمن اور اس کے اتحادیوں کی جانب سے غزہ کی مزاحمت کو نشانہ بنانے کے فیصلہ کے باعث ہمیں بھی ان حملوں کا براہ راست طور پر سامنا ہے۔ انہوں نے زور دیتے ہوئے مزید کہا کہ غزہ کی حمایت پر مبنی یہ جنگ سب سے درست فیصلہ تھا کیونکہ یہ مکمل طور پر انسانیت، آزادی اور حب الوطنی پر استوار ہے، چاہے اس کی قیمت کچھ بھی ہو!